என்னென்ன தேவை?உடைத்த கோதுமை - 1 கப், கடலைப் பருப்பு - அரை கப், வாழைக்காய்-1 கத்திரிக்காய் - 2, பீன்ஸ் - 8 முருங்கைக்கீரை - கைப்பிடி அளவு, பெரிய வெங்கயாம் -1 உரித்த பட்டாணி - கால் கப், கேரட் - 1, புளிக் கரைசல் - சிறிது, உப்பு - ருசிக்கேற்ப, சாம்பார் பொடி - இரண்டரை டீஸ்பூன், மஞ்சள் தூள் - கால் டீஸ்பூன், எண்ணெய் - 2 டீஸ்பூன், கடுகு - கால் டீஸ்பூன், வெந்தயம் - 1 டீஸ்பூன், கறிவேப்பிலை -சிறிது, நறுக்கிய கொத்தமல்லி - சிறிது.
எப்படிச் செய்வது?
கோதுமையில் 2 கப் தண்ணீர் சேர்க்கவும். கடலைப் பருப்பைக் கழுவி அதில் 1 கப் தண்ணீர் சேர்க்கவும். இரண்டையும் குக்கரில் வேறு வேறு பாத்திரத்தில் வைத்து, 10 நிமிடங்கள் வெயிட் வைத்து வேக வைக்கவும். எல்லா காய்கறிகளையும் நீள வாக்கில் நறுக்கவும். கேரட், பீன்ஸ், பட்டாணி மூன்றையும் ஆவியில் வேக வைக்கவும். கடாயில் எண்ணெய் விட்டு சூடாக்கி கடுகு, வெந்தயம், கறிவேப்பிலை தாளித்து, முதலில் வெங்காயம் சேர்க்கவும். வெங்காயம் பாதி வதங்கியதும், கத்திரிக்காய், வாழைக்காய்,முருங்கைக்கீரை சேர்த்து 5 நிமிடங்கள் கிளறி விடவும். அத்துடன் புளிக்கரைசல் சேர்த்து சிறிது நேரம் வேகவிடவும். வெந்த கேரட், பீன்ஸ், பட்டாணி சேர்த்து, உப்பு, மஞ்சள்தூள், சாம்பார் பொடி சேர்த்து 2 நிமி்டங்கள் கொதித்த பிறகு வெந்த பருப்பு, கோதுமை சேர்த்து நன்றாக கெட்டியாகும் வரை கிளறவும். கொத்தமல்லி சேர்த்து இறக்கி சூடாகப் பரிமாறவும்.